miércoles, 17 de octubre de 2018

CANTAMOS BINGO E APRENDEMOS MÁIS SOBRE JOAN MIRÓ!

Esta mañá, na nosa aula, apareceron estas casiñas tan coloridas que nunca antes víramos. Estaban cheíñas de números, pero non sabíamos moi ben por que... Pois ben, resulta que estas son as vivendas nas que habitan tódolos números do mundo e, como non podía ser doutra maneira, viven coa súa familia, igual ca nós! Así pois, hoxe coñecemos á familia do 0, do 10, do 20, do 30, do 40, do 50, do 60, do 70, do 80 e ata a do 90!


Comezamos pola primeira casiña, a da familia do 0. Xa coñecemos a tódolos números que aquí viven, así que non fixeron falta as presentacións. O que si, utilizamos estes números para coñecer un novo xogo na nosa aula: o bingo! Gustounos moitísimo e pasámolo moi ben, iso si, para que este xogo vaia aumentando un pouquiño a súa dificultade, xa sabemos o que temos que facer... Coñecer pouquiño a pouco aos demais habitantes das casiñas que xa forman parte das nosas rutinas diarias!

A parella gañadora foi a formada por Andrea e Alejandro G.! Felicitámolos e alegrámonos moito por eles, xa que o importante é participar e pasar un ratiño divertido cos nosos amigos! E como no cole se aprende de todo, esta situación serviunos para reflexionar sobre o feito de facer trampas, xa que a algunha parella non lle gustou perder e decidiu enganarnos e cantar bingo cando non saíran todos os números do seu cartón. Por suposto, falamos con ese Pondaliñ@ e pediunos perdón. Como non podía ser doutra maneira, perdoámolo e estamos segurísimos de que isto non volverá a suceder en ningún xogo! 
Aquí vos deixamos algunhas imaxes da partida de hoxe!



Para continuar co día, recordades que a semana pasada vos falamos dun conto titulado 'O cadro máis bonito do mundo'? Pois agora xa podedes saber que se atopa no seu interior, nós xa o descubrimos o pasado xoves...


Si, fai uns días que descubrimos que o cadro máis bonito do mundo foi o que soñara o artista Joan Miró, un cadro que tiña por protagonistas 5 manchas un tanto viaxeiras... Tanto lles gustaba viaxar que chegaron ata a cidade de Barcelona, e foi aí cando o noso compañeiro Mario recordou emocionado que el pasaría a ponte nesa mesma cidade. Por suposto, tivémoslle que facer un encargo moi importante: buscar obras de Miró pola cidade de Barcelona! E vaia se as atopou, aquí o temos coa escultura que leva por nome "Muller e Paxaro", e tamén co "Mosaico Miró". Contounos o noso compañeiro que ambas obras llas encargou a cidade de Barcelona a Joan Miró para darlle a benvida a tódolos visitantes que entrasen na cidade por terra ou por mar, respectivamente. E en todas elas podemos ver as cores das manchas do cadro máis bonito do mundo. Moitas grazas Mario por estas imaxes, foches un gran reporteiro!



Para seguir aprendendo máis deste artista, hoxe tocou debuxalo. Iso si, non de calquera maneira, senón fixándonos moito moitísimo nunha das imaxes do conto. Non podía faltar nadiña, ningún detalle, e tíñase que parecer o máximo posible ao Joan Miró do noso conto. O que tampouco podían faltar eran as 5 manchas do seu cadro. Vós que pensades, credes que o conseguimos?


E xa para rematar, aproveitamos para comentarvos que, como ben sabedes, no día de onte comezamos novamente co préstamo bibliotecario. Aproveitando a nosa visita á biblioteca, ademais de saúdar a Cleo, fixemos algo que á mascota lle encanta: ler un conto. Concretamente, subimos da aula un libro que nos trouxo o noso compañeiro Mario como aportación ao proxecto sobre o Universo. Falaba dos requisitos para ser astronauta e como é a vida no Espazo. Gustounos moito, grazas compañeiro!


E onte tamén tivemos outra petición especial... Cando baixamos da biblioteca, tivemos que rematar un traballiño que comezamos antes do recreo, porque tanto tivemos que escribir en minúscula que non puidemos acabalo antes. Pero cando o fixemos, aínda tivemos un tempiño para xogar nos recunchos, e tres nenos que escolleron os quebracabezas necesitaban que lles sacásemos unha foto con el rematado! Así que aquí está!


E polo momento nada máis, seguiremos informando!

lunes, 15 de octubre de 2018

NOVA MISIÓN DE VALENTINA TERESHKOVA!

Esta mañá, nada máis chegar á aula, unha nova mensaxe da primeira muller astronauta estaba esperando por nós... Si, Valentina Tereshkova visitounos unha vez máis e tiña algo importante que comunicarnos! Aquí vos deixamos a mensaxe de hoxe:


Como vedes, o Señor do Tempo contoulle moito do que estivemos aprendendo sobre o planeta Mercurio, e esta semana a nosa compañeira de aventuras quere que investigamos máis sobre o planeta de Alejandro G., Andrea, Aroa P., Brais P. e Naia! Si, esta semana aprenderemos máis e máis sobre o planeta Venus!

Coa emoción dos nosos avances, a astronauta ata foi quen de atopar unha nova peza do mapa que nos enviou a semana pasada. Xa temos dous anacos, a ver se Valentina pode encontrar algún cachiño máis na súa nave espacial! Mentres, os Pondaliñ@s de 5 anos seguiremos facendo o que nos pide e nesta ocasión indagaremos sobre o planeta máis brillante de todo o Sistema Solar!


Por suposto, como tódolos luns, a profe Bea enterouse de que Valentina Tereshkova nos enviara unha nova mensaxe e preparou unha clase de Psicomotricidade á altura da nosa nova misión. Mirade, mirade!

Comezamos xogando cos aros! Nesta ocasión, convertémonos no Sol e introducímonos no interior do aro, pois este simulaba ser a órbita que realiza Venus cando xira ao noso redor. Como tódolos planetas, Venus xira arredor do Sol, e a súa órbita é a máis circular de todo o Sistema Solar... E de que ten forma o aro? Claro, de círculo!




Continuamos sabendo máis sobre a órbita do segundo planeta do Sistema Solar... Sabíades que Venus é o único planeta que xira en sentido contrario? Pois si! E por iso realizamos un xogo de equilibrio sobre unha corda, pero en vez de ir cara diante coma tódolos planetas, nós fomos cara atrás... E cando o conseguimos, a profe Bea púxonolo máis complicado. Os planetas, ademais de xirar arredor do Sol, xiran sobre si mesmos. Así que alá fomos os Pondaliñ@s de 5 anos, marcha atrás e dando voltas sobre nós mesmos! E con moito coidado e ben amodiño, pois Venus xira moi lento e, ademais, se algún planeta caía da corda este perdíase polo Espazo! E iso é un problema moi grande!


E xa para rematar a sesión, descubrimos que Venus é o planeta máis quente de todo o Sistema Solar. Así que os 5 Venus da nosa aula (Alejandro G., Andrea, Aroa P., Brais P. e Naia) puxeron uns petos verdes ben rechamantes e dedicáronse a atrapar aos demais elementos espaciais que corrían polo pavillón. Cando Venus atrapaba a calquera outro astro, este tiña que quedar completamente paralizado pola calor, e só podía volver a poñerse en movemento cando outro astro o abrazaba. Mirade que divertido!


E por hoxe nada máis, estes días contarémosvos os nosos avances no tema! Iso si, os problemas chegan de novo á aula de 5 anos... O curso pasado tivemos que explicar por que non podíamos facer unha excursión a Exipto, quen se anima a contarlle aos Pondaliñ@s por que non podemos comprar unha nave espacial e viaxar polo Universo con ela?

martes, 9 de octubre de 2018

CAL É O CADRO MÁIS BONITO DO MUNDO?

Esta mañá, a profe Rocío presentounos un conto que non coñecíamos ata o momento. Titúlase "O cadro máis bonito do mundo", e hoxe só puidemos observar a súa portada, na que vimos un marco, pero ningún lenzo... 


Como non sabemos nada da historia que se atopa no seu interior, reunímonos en asemblea para falar do que para nós sería o cadro máis bonito do mundo. Aquí vos deixamos as nosas aportacións cando decidimos plasmalas en papel! Moi pronto descubriremos o que se narra neste conto, e tamén coñeceremos a un novo pintor que nos acompañará nas nosas aventuras artísticas. Quen será? Moi pronto se descubrirá o segredo!


Como tamén podedes ver, ao estar en 5 anos, xa escribimos o noso nome en minúscula, coma os maiores! Durante este primeiro mes de curso estivemos recordando o trazo de tódalas maiúsculas, e tamén das vogais en minúscula, por se se nos esqueceran durante o verán. Pero agora... Agora xa toca coñecer a tódalas letras do abecedario en minúscula! Esta mañá presentóusenos o Panadeiro P, a personaxe que fai o pan e os pasteis máis ricos de todo o País das Letras! Despois de coñecelo quixemos escribilo no encerado, e quedáronnos unhas "p" xeniais!


O que tamén fixemos foi presentar oficialmente os materiais que fomos traendo á aula estes días relacionados coa temática do noso proxecto trimestral: O UNIVERSO!


Daniella quixo compartir con nós este fantástico debuxo da Vía Láctea, a nosa galaxia, así como unha pequena esfera que representa o noso planeta, a Terra. Grazas compañeira!


Hugo tróuxonos dúas representacións diferentes do planeta Terra: unha esfera e un globo terráqueo! Vimos tanto azul no noso planeta que isto nos levou a falar da auga, da presenza de auga noutros planetas, así como da existencia de vida no noso planeta. Falamos tanto e tiñamos tantas dúbidas que ata a profe nos tivo que explicar un pouquiño dunha teoría coñecida como a da evolución! Este proxecto dá para moito! Grazas compañeiro!


Naia volveu de novo con esta estrela que xa nos ensinara o curso pasado cando estábamos aprendendo máis sobre as estrelas de mar. Desta conversa saiu un novo astro do noso Universo... Un compañeiro falounos da Estrela Polar, a máis brillante do ceo, a que guiaba aos mariñeiros cando non existían os mapas nin os GPS! Interesantísimo! Grazas compañeira!


Xabi mostrounos un par de peluches que atopou na tenda da súa mamá. Un deles é unha estrela e o outro unha lúa. Esta última serviunos para que o noso amigo nos explicara por que a lúa cambiaba de forma. Moitos pensabamos que medraba e deixaba de facelo por si mesma, outros que alguén lle poñía e lle quitaba cachiños, pero o noso compañeiro encargouse de explicarnos que o que ocorría era que só víamos a parte que o Sol iluminaba, por eso ás veces estaba chea e outras veces, coma no peluche, ía menguando. Fantástico! Grazas compañeiro!


Alonso veu cargadiño cunha chea de información sobre o seu planeta. El é Neptuno, e temos un montón de páxinas por ler para saber máis do seu planeta. Se algún Pondaliñ@ quere imitar ao noso amigo e traer información específica do seu astro, na aula estaremos encantados de recibila para seguir aprendendo máis e máis do Universo! Como ben sabedes, o reto que esta semana nos deixou Valentina Tereshkova foi saber máis sobre o planeta Mercurio, así que se algún Mercuriño (Brais M., Daniella, Hugo, Roi ou Xabi) lle apetece compartir nova información do seu planeta con nós, pode traela ao longo desta semana! Grazas compañeiro!


Mario mostrounos unha maqueta do Sistema Solar que el mesmo pintou na súa casa. Na clase encargámonos de montala colocando os diferentes planetas segundo a súa distancia con relación ao Sol. Canto nos vai axudar para entender iso dos movementos sobre si mesmos e arredor do Sol, para seguir traballando o tamaño de cada un e a distancia ao Sol, e moitísimo máis! Grazas compañeiro!


Aroa chegou cargadiña con esta representación do Sistema Solar tan impresionante que creou co seu papá e co seu irmán! Está o Sol, tódolos planetas e ata a Lúa. E o mellor de todo, xira! Os planetas desta maqueta xiran arredor do Sol! É espectacular e axudaranos a seguir aprendendo máis e máis sobre o Universo! Ademais, tróuxonos un debuxo no que tamén aparece representado o Sistema Solar! Grazas compañeira!


Lucía trouxo da casa da súa avoa este par de mazarocas de millo! Veu con elas para falarnos do Outono, pero ao velas decatámonos de que se parecían moitísimo a uns foguetes espaciais, con lume e todo! Grazas compañeira!


Martina chegou emocionada á clase porque no patio atopou unha pedriña de cor branca que, segundo ela e outras compañeiras, era un cachiño de Lúa! Temos que comprobar se iso pode ser verdade, porque polo momento o único que coñecemos que cae ao solo do planeta Terra son os meteoritos! Ademais, aproveitou para ensinarnos un par de froitos de outono: unhas castañas e unhas noces que recolleu coa súa avoa! Grazas compañeira!

E por hoxe nada máis, seguiremos informando das nosas aventuras!

lunes, 8 de octubre de 2018

NOVA MENSAXE DE VALENTINA TERESHKOVA!

Esta mañá chegamos á aula e alí nos estaba esperando unha vella coñecida... Si, por fin volvíamos a ver a Valentina Tereshkova! Aquí vos deixamos o vídeo que quixo compartir con nós no día de hoxe!


Como vedes, esta semana temos unha nova misión: aprender máis sobre o planeta Mercurio! Así que se algún Pondaliñ@ quere traer máis información da que temos nos materiais da aula, estaremos encantados de recibila! 

Ademais, o que tamén recibimos foi o soporte dun mapa que Valentina atopou na súa nave espacial... Será o que a axude a volver á Terra? Nós pensamos que si! Só temos un problema... A nosa astronauta favorita só atopou unha peza que, por suposto, xa pegamos no seu lugar correspondente. Tamén estivemos buscando pola clase e polo patio a ver se Tereshkova nos deixara algunha peza máis, pero non atopamos nada. A ver se mañá temos máis sorte...

Do mesmo xeito, aproveitamos parte da mañá para rematar os nosos colgantes espaciais! Aquí tedes a 5 Mercurios, 4 Venus e 4 Neptunos, 3 Plutóns e 3 Soles, 2 Saturnos e 1 Urano e 1 Lúa, ademáis de outro Venus e unha Marte que hoxe non puideron vir ao cole!


E volvendo ao tema de Mercurio... A profe Bea enterouse do novo reto desta semana e preparounos unha clase de Psicomotricidade súper especial, e tamén súper espacial!

Comezamos coñecendo o tamaño de Mercurio, o planeta máis pequeno do Sistema Solar, e comparámolo co dos planetas máis grandes como Xúpiter ou Saturno. Aquí nos tedes en pleno proceso:


Seguimos transformándonos nun e mil astros que tiñan unha única misión: atrapar ao planeta Mercurio. Aquí podedes ver as carreiras que nos pegamos para atrapar aos nosos Mercurios de 5 anos:


Para rematar a sesión, antes do momento de relaxación, collemos as pelotas de espuma e lanzámolas contra a portería coma se fosen uns meteoritos que chocaban contra o planeta Mercurio, creando así tódolos cráteres cos que conta o primeiro dos planetas do Sistema Solar! Disto non temos imaxes, pero podémosvos asegurar que mentres aprendemos máis do Universo o estamos pasando estupendamente ben nas clases de Psicomotricidade! Moitas grazas profe Bea!

viernes, 5 de octubre de 2018

MANUALIDADES ESPACIAIS!

Ao longo desta semana, entre outras moitas actividades, os Pondaliñ@s de 5 anos fomos realizando diferentes manualidades relacionadas co Universo. Comezamos decorando os 25 foguetes que xa forman parte da nosa porta espacial! Agora entrar na nosa aula é moito máis divertido! Agardamos que vos guste!


Esta mañá recordamos as nosas datas de nacemento, e seguindo a táboa que nos trouxo a nosa compañeira Noa, fomos coñecendo cal era o noso astro: Mercurio (Roi, Brais M., Hugo, Daniella e Xabier); Venus (Naia, Alejandro G., Andrea, Aroa P. e Brais P.); Marte (Martina); Saturno (Nizar e Lucas); Urano (Marta); Neptuno (Leila, Noa, Alonso e Alejandro V.); Plutón (Mario, Mariña e Claudia); Sol (Zaira, Lucía e Izan); Lúa (Aroa V.). Logo, decorámolos con algo quen os gusta moito... Pintura e pinceis! Proximamente saberedes que faremos con eles...

Neptuno, Marte e Lúa.

Plutón e Sol.

Venus e Saturno.

Mercurio.

Ademais, os nenos e a nena que acoden a Atención Educativa durante este curso están abordando o tema da reciclaxe e reutilización de materiais coa profe Bea. Na nosa aula quixemos seguir o seu exemplo, e decidimos aproveitar a pintura sobrante, e tamén o soliño do patio, para crear uns murais sobre o Universo estampando unhas esponxas que tiñamos pola aula.





Así mesmo, aproveitamos para comentarvos que estamos tan motivados coa temática que xa comezamos a ver algún que outro astro nas nosas merendas... Mirade o que trouxo o martes a nosa compañeira Martina!


Igualmente, se a semana pasada estreábamos areeiro, estes días tocoulle ao novo parque de xogos. Aquí tedes a algúns Pondaliñ@s no recreo desta mañá!

lunes, 1 de octubre de 2018

PSICOMOTRICIDADE ESPACIAL!

Este trimestre, ademais de abordar a temática do Universo na nosa aula, tamén o faremos no pavillón. Durante os próximos meses, a profe Bea coordinarase coas nosas mestras para axudarnos a saber máis do Espazo e así botarnos unha man para salvar a Valentina Tereshkova!

Esta mañá participamos en dous xogos súper súper divertidos! O primeiro deles consistía nun circuíto de obstáculos, pero non eran osbtáculos calquera... Tiñamos que esquivar planetas, lúas, estrelas e asteroides para atopar a Plutón, o astro que agora é un planeta anano!




No segundo deles, participamos no tradicional xogo do pano. Mais desta vez os Pondaliñ@s non éramos números, senón que éramos o Sol, a Lúa e os planetas. E en vez dun pano, o que tiñamos que facer era correr moito para recoller as pezas dun foguete que se estropeou e que nós mesmos tivemos que reconstruír!


Canto nos divertimos! Moitas grazas profe Bea por facernos empezar a semana da mellor maneira posible! Aprendendo máis sobre o Universo e pasándoo súper súper xenial!

SUPERANIVERSARIOS DE SETEMBRO!

No día de hoxe estivemos de celebración, a primeira deste novo curso! Daniella fíxose maior e xa cumpriu 5 anos, polo que aquí a tedes no noso marco dos aniversarios! 


Nesta ocasión non temos coroas nin tampouco chapas conmemorativas, mais o que si que temos é unha capa de supercumpleañera con máscara a xogo! A temática deste curso serán os superheroes e as superheroínas, e na clase de 5 anos estámonos metendo de cheo nela celebrando desta maneira tan especial os nosos aniversarios!


Por suposto, os demais Pondaliñ@s transformámonos en superinvitados e superinvitadas! Como non podía ser doutra maneira, felicitamos á nosa compañeira Daniella, e aquí estamos con Teo, que tamén se quixo unir á nosa celebración!


Así mesmo, tamén lle fixemos un bonito agasallo. Desta vez non tocou un portafotos nin tampouco unha postal coma en anos anteriores, senón que o que fixemos foi un gran libro de debuxos para a nosa compañeira. Mirade, mirade!


Xa nos nosos lugares cantámoslle o "Cumpleaños feliz" mentres a nosa amiga sopraba a súa vela de aniversario!


Despois disto, o que tocaba era encher as nosas barrigolas cunha saborosa tarta de galleta e chocolate que estaba deliciosa! Non quedou nadiña...


Iso si, os Pondaliñ@s non fomos os únicos invitados a esta celebración. Con nós tamén quixo compartir este momento Pury, a mamá de Daniella. Moitas grazas por vir!


MOITOS SUPERPARABÉNS E A CUMPRIR MOITOS MÁIS!