SEMANA DO SAMAÍN: CORREDOR DO TERROR E MOITO MÁIS!

No día de hoxe continuamos coas sorpresas de Samaín... Nada máis entrar ao colexio os primeiros sorprendidos fomos nós cando vimos os atuendos e as maquillaxes terroríficas de mestres e compañeiros! Aquí nos tedes aos Pondaliñ@s de 4 anos na nosa versión máis medorenta!

E falando de medo, onde algún de nós pasou moito foi no túnel do terror que tódolos anos prepara Teacher no seu corredor! Desta vez os sustos déronnolos uns zombies que saían de ataúdes, pallasos, noivas cadáver e outras personaxes ben medorentas, caixas e bebidas misteriosas... Aquí nos tedes antes de entrar!

Como non queríamos que máis monstros nos asustasen, a profe contounos que os podíamos facer desaparecer cun feitizo coma os que fan os bruxos e bruxas de Samaín. Antes de nada, escoitamos esta canción para ver como esta bruxa creaba a súa pócima máxica e así coller algunha idea para a nosa!

Feito isto, démoslle renda solta á nosa creatividade e á nosa imaxinación e verbalizando todo o que sabemos sobre o Samaín decidimos que a nosa pócima estivese composta polos seguintes elementos: rabo de rato (Alejandro); patas de araña (Alonso); cabelo de bruxa (Andrea); sangue de zombie (Aroa P.); cacho de lúa (Aroa V.); pelo de monstro (Brais M.); cabeza de esqueleto (Brais P.); raios de sol (Hugo); lingua de morcego (Izan); dentes de vampiro (Leila); boca de monstro (Lucas); brazo de vampiro (Lucía); nariz de fantasma (Mariña); unllas de can (Mario); ollo de pallaso (Marta); á de buxo (Martina); luz de estrelas (Naia); berro de "go away" (Nizar); ollos de gato (Noa); man de morto (Roi); anaco de cabaza (Xabi); e perna de boneca (Zaira).

Xa pola tarde, cada un coloreou o elemento que propuxo, introduciuno no noso caldeiro dos feitizos, e todos xuntos fixemos o conxuro para espantar a calquera monstro que estivese polo colexio... Funcionaría? Pensamos que si, xa que ao saír da nosa aula non nos atopamos con ningún! Que sorte!

E isto non é todo! O recreo de hoxe foi moi animado, xa que durante a media hora que durou estiveron soando cancións de Samaín que todos xuntos puidemos bailar! Ademais, un carriño da biblioteca saiu ao noso patio para que os que quixésemos puidésemos ler algunha historia de Samaín!

E xa para finalizar o día, recibimos a visita dos nenos e nenas de 6º de Educación Primaria, que nos viñeron propoñer o "Trick or treat?". Despois de facernos uns divertidos trucos, a cambio démoslle unhas chuches, aínda que nós tamén levamos algunhas para as nosas casas porque somos uns larpeiriños e unhas larpeiriñas!

VÉMONOS XOVES CON MÁIS SORPRESAS!