CATÁLOGO DE NADAL: PRIMEIRAS FOTOGRAFÍAS!

No día de hoxe comezamos a mañá estreando unha saborosa rutina... Xa estamos no mes de decembro, o mes do Nadal, así que o encargado ou encargada, despois de colocar o día no noso calendario, abrirá este outro e comerá unha doce chocolatina mentres comproba cantos días faltan para esta data tan sinalada. Hoxe foi a quenda de Alejandro!

Continuamos o día realizando as primeiras fotografías que formarán parte do noso catálogo de xoguetes...

Despois do recreo recibimos a visita de Olga e Suso, a mamá e o papá de Noa, e de Rosario e María, as mamás de Roi e Lucía. As familias recibiron con alegría as nosas cartas e trouxéronnos todo o que nos facía falta: dúas bicicletas, un patinete, unha moto e un tractor. Esta imaxe ilustrará o noso apartado de "Vehículos" e con ela demostramos que as cores non teñen xénero e que este non é un xogo exclusivo de nenos, xa que as nenas tamén se divirten moito conducíndoos.

Por outra banda, con relación ao apartado de "Disfraces", as familias de Martina, Lucía e Mariña tamén nos enviaron estes disfraces de superheroes e superheroínas, xa que as nenas, ao igual que os nenos, poden ser súper valentes e salvar ao mundo as veces que fagan falta! Ademais, demostramos que non hai disfraces de nenos e de nenas, senón que todos podemos disfrazarnos e xogar co que máis nos guste, independentemente de se levamos falda ou pantalón. O importante é divertirse!

Así mesmo, no apartado "Peluches e bonecos" contamos coa colaboración das familias de Roi e Noa, que ademais dos vehículos, tamén nos trouxeron estes dous bebés. Algúns de nós seremos papás e mamás (ou tías e tíos, madriñas e padriños...) cando sexamos adultos, e tanto nenos coma nenas terán que coidar algún bebé, e uns e outros terémolo que facer do mesmo xeito, sen importar se somos mulleres ou homes!

O mesmo ocorre no apartado de "Cociñas e supermercados", xa que dentro duns aniños teremos que realizar as tarefas do fogar (cociñar, mercar, barrer, fregar, lavar...), e compartir estes labores en igualdade de condicións, sen importar se somos homes ou mulleres.

Por último, no apartado "Medios de transporte" poderemos ver a nenos e nenas xogando con coches, camións, excavadoras, etc., xa que todos o pasamos estupendamente ben, e para nada importa se somos nenas ou nenos.

Esta tarde non nos dou tempo a realizar máis fotografías xa que disfrutamos cos nosos compañeiros e compañeiras de 3 e 5 anos dunha pequena sesión de cine. Continuaremos a próxima semana!

Iso si, antes de marchar da aula o noso compañeiro Izan alimentou aos nosos caracois con estas ricas follas de leituga!