DESPEDIMOS AOS CARACOIS!

O pasado martes comezamos a mañá no hall da nosa escola, e antes de subir á nosa aula colocamos as estrelas que picamos e pegamos na clase e que xa adornan a árbore de Nadal do noso colexio!

Así loce a nosa árbore despois de que tódolos cursos pasasen a colocar as súas estrelas. Ademais, nas paredes do hall xa podedes ver as nosas postais e as de tódolos compañeiros e compañeiras de Educación Infantil e Educación Primaria!

Seguidamente, a profe dounos unha triste noticia... Tiñamos que despedirnos dos nosos caracois, xa que ninguén os podía coidar durante a ponte, e ademais, as vacacións de Nadal tamén están moi preto. Por este motivo, baixamos ao patio e liberámolos no xardín para que puidesen atoparse con outros caracois e buscar o seu propio alimento! Iso si, durante o recreo estivemos moi pendentes de que nada lles ocorrese. E hoxe estivemos buscando por eles, pero pensamos que deben estar hibernando por culpa dos ventos e das chuvias da borrasca Ana porque non vimos ningún.

Para que a despedida non fose tan triste, e como actividade final deste proxecto que tanto nos gustou, pola tarde divertímonos co "Xogo do Caracol". Neste colorido taboleiro tiñamos que tirar un dado para facer que o noso pequeno caracol avanzase tantas casiñas como puntiños saían. Iso sí, o caracol só se podía arrastrar polo taboleiro se respondíamos correctamente á pregunta que a mestra nos facía...

Fixémolo tan pero tan ben que o noso caracol chegou rapidamente á meta, e nós gañamos uns carnets de expertos e expertas en caracois e un xogo con preguntas para cada unha e cada un de nós que xa levamos para as nosas casas para seguir xogando coas nosas familias e non esquecernos nunca dos que foron os nosos compañeiros de clase durante varios meses!