PRIMEIRA MISIÓN DE VALENTINA TERESHKOVA!

Esta mañá, nada máis entrar na aula, sorprendémonos ao atoparnos esta caixa na nosa alfombra! Traballiños, un libro de información, plastilina e globos...  De onde podía vir? Por suposto, viña do Espazo!

Por que o descubrimos? Pois porque xunto a esta caixa, tamén chegou unha mensaxe dende algún punto do Universo. Como non podía ser doutra maneira, o vídeo só o puido filmar Valentina Tereshkova!

Aceptada a misión, tiñamos que dar resposta á pregunta que nos formulou: "Como se formou o Universo?". Estabamos convencidos de que a resposta se atopaba no libro que nos enviou, así que un par de compañeiros puxéronse mans á obra! E vaia se a atoparon... Agora xa sabemos que a teoría que explica a formación do Universo é a do 'Big Bang' ou 'Gran Explosión'! Ademais deste, tamén consultamos outros libros que trouxeron outros Pondaliñ@s e, por suposto, vimos varios vídeos que explicaban este proceso.

Pero por se isto non era suficiente para comprender a teoría do 'Big Bang', despois do recreo decidimos vivenciala corporalmente no patio. Ata a semana que vén non teremos clase de psicomotricidade porque a profe Bea estalle botando unha man aos Pondaliñ@s de 3 anos co período de adaptación, polo que durante ese tempiño decidimos facer uns xogos no patio para sentir no noso propio corpo o que foi esa 'Gran Explosión' e tamén para vivenciar o movemento de rotación e traslación dos planetas, movemento do que xa nos falara algún Pondaliñ@ esta mesma mañá. Aquí nos tedes en pleno baile de corpos celestes!

E para rematar o día, completamos o traballiño que Valentina nos deixou e que formará parte do 'Libro do Universo' no que recompilaremos toda a información que vaiamos atopando para rescatar á nosa astronauta favorita. Aquí vos deixamos a Alejandro, o encargado de hoxe, en pleno proceso.

A ver que sorpresas nos esperan estes días! Seguiremos informando!