BALEA DE PLÁSTICO!

Como ben sabedes, no día de onte celebramos o Día da Paz, xornada que lle dedicamos á ecoloxista africana Wangari Maathai, unha muller que destinou a súa vida a repoboar bosques en Kenia xunto ás mulleres do "Cinturón verde".

Como ben di o noso lema deste ano: "Coidar a natureza é facer paz". Por este motivo, ademais de valorar o traballo destas mulleres de paz, decidimos relacionalo co noso proxecto trimestral e facer unha pequena reivindicación.

Os Pondaliñ@s de 5 anos somos moi conscientes da importancia de reducir, reciclar e reutilizar materiais para evitar que estes rematen nos océanos e, como consecuencia, no estómago de moitos animais mariños, como as baleas sobre as que estamos a aprender máis.

Pois ben, esta mañá coñecemos a maneira a través da que dúas organizacións fixeron visible esta problemática e denunciaron a grave situación na que viven, entre outros animais, as baleas. Deste xeito, presentáronnos dúas esculturas con forma de balea construídas integramente con plástico recollido en diferentes mares e océanos. Unha atópase en Bélxica e a outra en Filipinas, e como non podía ser doutra maneira, lemos un par de noticias que nos falasen máis delas, o que nos levou a ter unha longa asemblea sobre a importancia de non contaminar.

Polo momento descoñecemos a causa da morte da balea de Valarés, pero aínda que esta non fose a inxesta de lixo, a mestra propúxonos crear a nosa propia escultura de plástico para concienciar a calquera persoa que visite o noso corredor ou que lea este blog.

Aceptamos a proposta sen dubidalo e puxémonos mans á obra cos diferentes materiais que nos presentou a profe:

Un equipo encargouse de recortar as fotografías e as descricións das baleas de plástico de Bélxica e Filipinas, así como uns titulares de xornal que nos fixeron máis conscientes do número de baleas que morren a causa da inxesta de plástico.

Outro grupo foi o encargado de decorar as letras que compoñen o noso lema deste ano, así como as descricións das fotografías anteriores.

O último equipo foi o encargado de pegar os tapóns azuis que se atopaban no armario da reciclaxe para compoñer a nosa balea de plástico.

E os tapóns que faltaban rematáronos de pegar os nenos e a nena que acoden a Atención Educativa, xa que coa profe Bea están aprendendo moito sobre a reciclaxe e a reutilización de materiais.

E así de xenial nos quedou:

Á volta do patio, por quendas, fomos pegando os elementos que antes recortáramos e coloreáramos. Comezamos polo noso lema:

Continuamos polos titulares de xornal. Mirade canto lixo chegan a atopar dentro do corpo das baleas! É unha barbaridade!

De seguido, era a quenda das fotografías das baleas de plástico de Bélxica e Filipinas:

E xa para rematar, firmamos como autoras e autores desta obra artística que ten por obxectivo informar e concienciar sobre esta gran problemática mundial:

E este foi o resultado final, agardamos que vos guste! Por suposto, a caixa tamén foi reutilizada!

E aquí nos tedes a nós con ela:

Agora a nosa balea de plástico xa se atopa no corredor de Educación Infantil para que calquera persoa que por alí pase poida informarse e saber máis sobre este gran problema que sofre o noso planeta. Esperamos que todo o mundo nos bote unha man para protexer a natureza, que só temos unha!

Ademais, como vos prometemos onte, aquí vos deixamos o símbolo da paz completamente rematado despois de que tódolos nenos e nenas da nosa escola pasasen por este taller de manualidades tan divertido. Agardamos que vos guste! Moi pronto formará parte dunha das paredes da nosa entrada!