UNHA BALEA VARADA EN VALARÉS!

Sen dúbida, a noticia desta fin de semana foi a aparición dunha balea varada na praia de Valarés! Tódolos Pondaliñ@s chegamos emocionados ante este acontecemento e, sobre todo, cargadiños de información. (Moitas grazas familias por eses deberes de domingo que vos puxo a profe!) 

Aproveitando todo o que sabíamos sobre o tema realizamos unha asemblea que durou sobre unha hora e na que non deixamos de falar sobre o varamento desta balea! Fixemos hipóteses sobre unha e mil cuestións: Onde? Cando? Como? Por que? E un longo etcétera de preguntas sen resolver...

Por este motivo decidimos que, por suposto, debíamos investigar máis sobre este suceso. Así que familias... É moi probable que este trimestre desenvolvamos dous pequenos proxectos ao mesmo tempo. Xa vos contaremos!

E entre quenda e quenda de palabra, a nosa compañeira Aroa Penedo fixo unha gran revelación: o seu papá foi un dos encargados de rescatar a balea varada de Valarés! As cuestións que xurdiron ao respecto foron moi numerosas, e isto só se podía resolver dunha maneira: invitando a Luis á nosa clase para que nolo explicase de primeira man.

Deste xeito, puxémonos mans á obra e conxuntamente de maneira oral démoslle forma á carta que queríamos enviar, para despois escribila no ordenador, imprimila e firmala entre todos.

Aroa foi a encargada de levarlla ao seu papá... Será que mañá poidamos ter unha resposta? Quen sabe... Estamos expectantes e emocionadísimos!

Aquí vos deixamos un pequeno resumo do que foi o día de hoxe: