MATISSE E MOITO MÁIS!

O día de hoxe foi moi axetreado... Comezamos coma tódolos días, quitando chaquetas, mochilas e axendas, e poñendo mandilóns. Como aínda non temos rutinas nin encargado ou encargada (para a próxima semana xa si!), sentamos na alfombra e comprobamos todo o que recordabamos do curso pasado: do outono e a cabaciña, do Nadal e o Apalpador, do inverno e os esquimós, da primavera e as caterpillars... Tamén cores, formas, letras e números! E, por suposto, as normas da clase!

A profe tamén nos dixo que nos irá ensinando, pouquiño a pouco, como xogar a tódolos novos xogos que temos nos nosos recunchos. Hoxe foi a quenda dun Memory xigante! Aquí tedes o antes e o despois, fixémolo fenomenal e participamos tódalas nenas e tódolos nenos da aula!

A profe tamén nos recordou que o próximo domingo é o aniversario da nosa compañeira Daniella. Como non a podemos felicitar en persoa, decidimos enviarlle unha postal cunha mensaxe moi bonita e moitos bicos cheos de amor!

Pasounos o tempo voando e xa era hora da clase de Psicomotricidade. Coma o profe Xalo estalle axudando aos nosos compañeiros e compañeiras de 3 anos a vir moi contentos ao cole, hoxe visitamos o pavillón co profe Carlos!

Despois do baño, a merenda e o recreo, coma sempre, tocaba volver á calma. Hoxe, en vez de facelo nas nosas mesas, decidimos tumbarnos tranquilamente na alfombra mentres escoitabamos unha bonita canción...

Despois de repousar, moi atentos escoitamos a historia dun vello coñecido... Chámase Matisse, e el foi o autor daquel cadro que nós reproducimos o curso pasado: "O esquimó". Coñecemos a súa historia, como pasou do pincel ás tesoiras, e tamén como foi ao ceo. Por suposto, observamos moitos dos seus cadros.

Despois dos foguetes que botamos tras escoitar unha historia, decidimos transformarnos nuns pequenos Matisse, e con pinturas e pinceis creamos os nosos cadros, con moitas formas e moitas cores. Fixémolo fenomenal e moi pronto as nosas obras de arte estarán expostas na aula para que calquera que nos visite as poida admirar!

Xa para rematar a xornada, tocaba lavar as mans e quitar tódolos restos de pintura, limpar as mesas ata quedar relucentes e gardar os mandilóns nas mochilas para levalos ás nosas casas, xa que hoxe é venres. De novo relaxados, volvemos ao baño e cargamos coas mochilas, rumbo ao comedor ou ás nosas casas. Ata o próximo luns Pondaliñ@s!