GRAZAS.

Estimadas familias:

Síntoo. Sinto moito que no día de onte, unha vez máis, se lle negase aos vosos fillos e fillas a posibilidade de ter unha educación integral e de maior calidade. Síntoo de verdade.

Despois da decisión tomada, como mestra só queda darvos as grazas.

Grazas, moitas grazas a todos os que lle dixestes si á xornada continua.

Grazas, moitas grazas por apoiar unha xornada na que non se producen interrupcións horarias que prexudican a atención do alumnado e que, sen ningunha dúbida, favorece que o rendemento intelectual das nenas e dos nenos sexa maior. Non hai mellor experto que o que pasa cinco horas con eles e elas nunha aula, e a miña está aberta para quen o queira comprobar.

Grazas, moitas grazas por pensar no seu futuro, por intentar que nos próximos anos teñan un maior tempo de lecer que permita combinar os tempos de estudo coas súas actividades extraescolares e o ocio en familia, sen renunciar a ningunha destas opcións.

Grazas, moitas grazas por intentar garantir a estabilidade do profesorado no centro.

Finalmente, grazas, moitas grazas á ANPA do CEIP Eduardo Pondal por todo o traballo realizado, porque a pesar dunha porcentaxe, loitaron polo que queremos unha gran maioría. E iso quedou demostrado.

Así pois, os vosos pequenos e as vosas pequenas, ademais de sufrir as consecuencias dun elevado número de alumnado na súa aula, que o próximo curso seguirá aumentando, tamén teñen que seguir sufrindo un horario que os limita en moitos aspectos.

Pola miña parte, como adulta e profesional, teño a capacidade de adaptarme a esta adversidade e, como ata o momento, seguirei poñendo todo o meu esforzo para que as nenas e os nenos, que son o realmente importante en todo isto, aprendan a adaptarse do mesmo xeito ao que lles toca vivir, aínda que ninguén se acordase de pedirlles opinión.

Un saúdo,

Rocío.