IMPLANTACIÓN DA XORNADA ÚNICA DE MAÑÁ.

Estimadas familias:

Como ben sabedes, no día de hoxe produciuse a votación, tanto no CEIP Eduardo Pondal de Ponteceso coma no CEIP As Forcadas de Corme, que pretendía conseguir a implantación da xornada única de mañá en ambos centros.

A participación foi do 91,61% en Ponteceso (142 de 155 familias) e do 100% en Corme (43 de 43 familias).

En ambos centros se precisaba, como mínimo, un 58% de votos favorables con respecto ao censo total. Así pois, en Ponteceso eran necesarios un mínimo de 90 votos (Porcentaxe do 0,58 x 155 familias = 89,9 votos) e en Corme de 25 votos (Porcentaxe do 0,58 x 43 familias = 24,94 votos).

Unha vez realizado o escrutinio, en Ponteceso obtivéronse 92 votos afirmativos fronte a 50 votos negativos. Pola súa banda, en Corme foron 35 votos afirmativos fronte a 8 votos negativos. En ningún centro se depositaron votos en branco ou votos nulos.

Aquí vos deixamos as actas que corroboran esta información:

Polo tanto, como mestra dos vosos fillos e fillas, compráceme informarvos de que a partir do vindeiro curso 2018/2019, a xornada única de mañá queda implantada en ambos centros, e as nenas e nenos de Ponteceso poderán gozar dun horario lectivo que, na nosa escola, irá das 9:15 ás 14:15 horas. Seguidamente, das 14:15 ás 15:15 horas poderán facer uso do servizo de comedor e, seguidamente, do servizo de transporte escolar. Por último, de martes a venres, das 15:30 ás 17:30 horas poderán facer uso do servizo de biblioteca-ludoteca, así como do traslado desde o propio centro ás actividades extraescolares ofertadas polo concello.

Como augurei fai unhas semanas, emulando as palabras que escribín fai un ano, nesta ocasión quero darvos as grazas, darvos as grazas a todas as familias do CEIP Eduardo Pondal de Ponteceso e do CEIP As Forcadas de Corme que lle dixeron si á xornada única de mañá. E, en especial, ás familias da miña titoría que lle dixestes si á mesma. Finalmente, a maioría silenciada por unha porcentaxe inxusta durante catro anos logramos o noso obxectivo: o maior benestar dos nenos e nenas de Ponteceso e Corme.

Así pois, despois da decisión tomada, como mestra só queda darvos as grazas.

Grazas, moitas grazas a todos os que lle dixestes si á xornada continua.

Grazas, moitas grazas por apoiar unha xornada na que non se producen interrupcións horarias que prexudican a atención do alumnado e que, sen ningunha dúbida, favorece que o rendemento intelectual de nenas e nenos sexa maior.

Grazas, moitas grazas por pensar no seu futuro, por lograr que nos próximos anos teñan un maior tempo de lecer que permita combinar os tempos de estudo coas súas actividades extraescolares e o ocio en familia, sen renunciar a ningunha destas opcións.

Grazas, moitas grazas por conseguir garantir a estabilidade do profesorado no centro.

Finalmente, grazas, moitas grazas á ANPA do CEIP Eduardo Pondal por todo o traballo realizado, porque a pesar dunha porcentaxe, loitaron polo que queríamos unha gran maioría. E iso quedou demostrado, e desta vez, conseguido.

Así pois, os vosos pequenos e as vosas pequenas, a pesar de ter que sufrir as consecuencias dun elevado número de alumnado na súa aula, que o próximo curso seguirá aumentando, por fin poderán gozar das vantaxes dun horario que os beneficia en tódolos aspectos.

Pola miña parte, como adulta e profesional, creo que fixen todo o posible e todo o que estaba nas miñas mans para defender a implantanción da xornada única de mañá: mostrar publicamente a miña opinión baseada en argumentos pedagóxicos sólidos e constatables, desmentir falsas informacións, resolver dúbidas... En definitiva, informarvos ás familias e, por suposto, ao meu alumnado. Non debemos esquecernos de que son eles e elas os que pasan de 5 a 7 horas no centro educativo e a pesar de ter entre 4 e 5 anos son perfectamente conscientes da situación que viven e esta votación non lles podía ser allea, pois ao fin e ao cabo, estase decidindo única e exclusivamente sobre o seu futuro. Sobre nada máis, e a súa opinión debería ser a máis importante. A miña conciencia está moi tranquila, a xornada única de mañá é a xornada na que confío e na que creo firmemente por ser a máis beneficiosa para os nenos e nenas, pois non debemos esquecernos de que elas e eles son o único e realmente importante en todo isto. 

Por suposto, como mestra seguirei poñendo todo o meu empeño e todo o meu esforzo en todas e cada unha das actividades que realice con ou para o meu alumnado, dentro e fóra da aula. E a partir do vindeiro curso 2018/2019, con moitas máis ganas e con moito máis entusiasmo por non ter que darnos de bruces contra esas tardes que nos martirizaban e frustraban dunha maneira que non podedes imaxinar, a min e a os meus nenos e nenas.

Unha vez máis, como mestra, grazas, moitas grazas por eses 92+35 síes. Agora dóuvolas eu no seu nome, o próximo curso daránvolas as vosas fillas e fillos a vós. Aínda non sodes conscientes do gran agasallo que lle fixéchedes fai unhas horas coa vosa decisión.

Un saúdo,

Rocío.