DÍA INTERNACIONAL CONTRA A VIOLENCIA DE XÉNERO!

Mañá, 25 de novembro, conmemórase o Día Internacional contra a Violencia de Xénero, mais no noso colexio adiantamos esta conmemoración ao día de hoxe. Comezamos a xornada cos nosos compañeiros e compañeiras de Educación Infantil escoitando a tres nenas e un neno de 6º de Educación Primaria, os cales nos explicaron o porqué desta conmemoración, faláronnos de diferentes situacións inxustas e mostráronnos os carteis en defensa da igualdade que expuxeron no hall.

Ao entrar na aula atopamos algo na nosa alfombra... Dous contos que xa coñecemos como son "Artur e Clementina" e "O libro dos porcos" e varios catálogos de xoguetes. Para que sería todo isto? De súpeto recordamos algo que nos dixeran dúas das nenas maiores...

Na gran maioría de catálogos a cor rosa asóciase ás nenas e a cor azul aos nenos. Isto é así? Claro que non, as cores non teñen xénero! E así o demostramos cos nosos mandilóns... Non ocorre nada cando un neno pon un mandilón rosa ou violeta ou cando unha nena leva un azul. Ademais, descubrimos que na nosa aula nenos e nenas teñen a mesma cor de mandilón ou que hai nenos que levan rosa, azul e as demais cores no seu mandilón. Non sabemos por que os catálogos de xoguetes se organizan así, pero o que temos claro é que isto non nos parece para nada xusto.

Algúns teñen isto tan interiorizado que durante a merenda Alonso pediulle á profe unha palliña rosa e unha azul para tomar os seus bebibles e así demostrar que aínda que fose un neno daba igual a cor que escollese, el ía beber igual pola rosa que pola azul. Así mesmo, Lucía ensinounos o seu tupper, xa que aínda que fose unha nena podía gardar a súa merenda nun recipiente de ambas cores.

Ademais, tamén aproveitamos para falar por que nestes catálogos só vemos fotografías de nenas con algúns xogos e xoguetes (bonecas, cociñas, kits de maquillaxe e perruquería, disfraces de princesas...) e de nenos con outros (coches, balóns, kits de ferramentas, disfraces de superheroes...). Que ocorre, que unha nena non pode xogar ao fútbol e un neno non pode cociñar? Ben sabemos que isto non é así, e senón mirádenos a nós xogando nos recantos que libremente escollemos pola tarde!

Démonos conta de que os catálogos que hoxe manipulamos están bastante equivocados e non nos respectan para nada, xa que nenos e nenas temos dereito a xogar co que nós queiramos, sen importar a cor ou a funcionalidade dos xoguetes. E sabedes que imos facer nós agora que se achega o Nadal? Pois crear o noso propio catálogo, un moito máis xusto e realista. Nel serán os nenos e as nenas os que xoguen con distintos xoguetes sen ter en conta a súa cor, os nenos e as nenas os que se ocupen das tarefas do fogar, os nenos e as nenas os que conduzan coches e camións... Porque todos podemos ser o que queiramos e xogar co que nos dé a gana sempre e cando non lle fagamos dano a ninguén (porque tamén aproveitaremos para falar dalgúns xoguetes violentos que por alí atopamos: espadas, pistolas...). Que vos parece a idea?

Ademais, hoxe recibimos unha visita moi especial... Hoxe coñecemos a Nuba, unha cadeliña que a todos e todas nos roubou o corazón. Viña da man da Asociación Aloumiños (Asociación de Persoas con Necesidades Específicas da Costa da Morte), e con Julia e Laura escoitamos historias sobre coidado animal; paseamos, alimentamos e démoslle de beber a Nuba; aprendemos a recoller as súas cacas... Recordamos que sempre debemos coidar e tratar ben a tódolos animais, xa que cadeliñas coma Nuba tamén axudan a moitos nenos e nenas que teñen algún tipo de dificultade.

E aquí nos tedes con ela! (Faltan os nenos e nenas que comen na casa porque a serea xa soara e eles tiveron que saír un pouquiño antes) Volve cando queiras Nuba, estaremos encantados e encantadas de recibirte!

Na páxina de Facebook desta asociación podedes atopar máis fotografías!

Para rematar este día, picamos as estrelas que moi pronto decorarán a árbore que se colocará na entrada da nosa escola! Que rápido está pasando este 1º trimestre!