QUE FIXEMOS HOXE?

Esta mañá, despois das rutinas do encargado, descubrimos que na nosa aula apareceron dous dados xigantes que nos axudarán, aínda que nós non o saibamos, a seguir avanzando nisto da subitización (establecer o cardinal dunha colección sen necesidade de realizar ningunha actividade de conteo, isto é, dicir cantos puntiños saen nos dados sen contalos). Algún xa chega a 6! Ademais, aproveitamos as nosas tiradas para realizar algunha que outra suma, axudándonos das nosas mans! Así mesmo, antes da merenda tamén tivemos tempo para incidir na grafía do número 4 e estampar as cabazas que faltaban para completar a colección. Mañá debuxarémoslle os ollos, o nariz e a boca, xa que hoxe quedaron a secar!

Os martes (e tamén os mércores) temos ao profe Xalo moito tempo na aula, así que esta tarde aproveitamos para seguir traballando nas nosas mesas, xa que ás veces precisamos axuda e ter dous profes na clase mola! Seguimos coa grafía da letra "u", e cada día facémola mellor! Aínda que a seguiremos practicando a través de xogos e traballo escrito, hoxe coñecemos á Raíña A... Queredes coñecer a súa historia?

Ademais, para rematar esta xornada, a nosa compañeira Lucía contounos ela mesma este conto tan divertido onde un caracol se vai transformando en diferentes animais! Encantounos!

E falando de caracois, estes seguen moi ben alimentados grazas a tódalas plantas e verduras que lles trouxo a nosa compañeira Noa!